Presyo sa bugas mais nikunhod
CEBU, Philippines - Nikunhod karon ang presyo sa bugas mais sa kamerkaduhan sa Sugbo samtang ni-stabilized usab ang presyo sa bugas humay.
Sumala pa sa tigpamaba sa National Food Authority (NFA)-7, Maria Lucia Rosales, nga sigon sa ilang price monitoring sa bugas dili mo-minus P1 ang pagkunhod sa presyo sa mais sa kamerkaduhan.
Matud ni Rosales nga ang labing taas nga presyo sa mais kaniadto niabot og P35 apan karon naa na lang sa P30 hangtud sa P34 matag kilo.
Si Rosales miingon nga nagpabilin sa P41 hangtud sa P43 matag kilo ang presyo sa bugas humay nga una na’ng nikunhod sa nakalabay nga semana gikan sa P45 matag kilo.
Apan iyang gitataw nga nagpabiling kapin sa P50 ang presyo sa first class nga bugas sama sa Ganador ug Senandoming.
Dugang ni Rosales nga ang hinungdan sa pagkunhod sa presyo sa bugas mais ug pag-stabilized sa presyo sa humay mao ang pagdagsa sa supply sa mais ug humay sa bodega sa mga suppliers ug ingon man ang hugot nga monitoring sa NFA sa presyo sa bugas sa kamerkadohan. (BANAT NEWS)
- Latest
