COMELEC mibasura sa kaso vs Rama

CEBU, Philippines - Gibasura sa Commission on Elections en banc ang reklamong kalapasan sa Section 261 sa Omnibus Election Code batok kanila ni Mayor Michael Rama ug Konsehal Mary Ann de los Santos.

Ang mga mireklamo batok kang Rama ug De los Santos mao sila si Jenalyn Didal, Marilyn Albarracin ug Edna Albarracin.

Niadtong Abril 3, 2013 sa gipahigayong meeting sa gymnasium sa Lahug Elementary School ang committee on scholarship  sa buhatan sa mayor sa dakbayan sa Sugbo nanghatag kini og scholarship vouchers sa bag-ong migradwar sa high school sa Barangay Lahug, Apas, Bario Luz ug University of the Philippines -Cebu Campus.

Matud sa mga reklamante nga si De los Santos kinsa niadtong higayona midagan isip konsehal sa siyudad misaka sa stage ug nangampanya sa iyang  kaugalingon ug sa ubang mga kandidato sa Team Rama.

Samtang si Rama miabot usab sa lugar ug misaka usab sa stage ug miawhag sa mga ginikanan nga mitambong sa maong kalihukan nga suportahan ang Team Rama. Gawas niini giingong gipanghinganlan ni Rama  ang mga kandidato sa Team Rama.

Ang mga reklamante mipasangil usab kang Rama nga mihatag og political speech ug mihangyo nga suportahan siya ug ang tibuok slate sa Team Rama sa umaabot nga May 13, 2013 election.

Ang Commission’s Law Department mitugyan sa maong kaso ngadto kang Atty. Temie Lambino, director IV, Comelec -7 kinsa mimando kang Atty. Enerio Ocariza, regional election attorney sa pagpahigayon og preliminary investigation.  Si Ocariza mirekomendar sa pagbasura sa kaso tungod sa kakuwang niini og merito.  Ang maong reklamo usab gi-dismissed sa Comelec En Banc niadtong Hulyo 10, 2014 tungod sa pagkakuwang niini og “probable cause.” (BANAT NEWS)