Upat ka hepe wa motunga sa drug test

CEBU, Philippines - Upat ka mga police station chiefs sa lalawigan sa Sugbo ang paesplikaron sa Cebu Provincial Police Office (CPPO) kun nganong wala sila motambong sa kinalit nga drug test niadtong nakalabay nga adlaw’ng Miyerkules.

Si Senior Superintendent Noel Gillamac miingon nga ang mga hepe sa kapulisan sa lungsod sa Barili, Bantayan, Poro ug Tudela lakip sa gimandoan sa pagtambong sa usa ka panagtigom nga gidunganan sa drug test.

Exempted hinuon ang Alcoy gumikan kay napatay man ang ilang hepe ug walay representante  nga nakatambong. Kung di sila makatubag karong adlaw nga Lunes hayan mag-atubang sila og kasong administratiba sa Provincial Investigation Detection and Management Branch (PIDMB).

Sa pakighinabi sa Banat News sa hepe sa lungsod sa Barili nga si Inspector Julius Ompad, kini mibutyag nga wala kini nakatambong sa maong programa gumikan pasado alas 10 na sa gabii sa Martes niya nadawat ang text message.

Matud pa ni Ompad nga buntag pa lang sa adlaw nga Martes nakadawat sab kini og usa ka sulat gikan sa Barili Municipal Council nga nag-imbitar kaniya nga patambungon sa usa ka executive session aron hisgutan ang peace and order situation sa maong lungsod.

Sumala pa ni Ompad sayod kini nga pulos importante ang duha ka programa, apan wala kini nagtoo nga duna ba diay drug test nga himoon sa CPPO ug nakaandam na ‘sab kini sa presentasyon nga ilang ipakita atubangan sa konseho sa lungsod sa Barili

Gitug-an sab ni Ompad nga gumikan ‘sab sa kalayo sa ilang lugar, mas gipili niya nga motambong sa imbitasyon sa konseho.

Samtang ang hepe sab sa lungsod sa Bantayan nga nahinabi sab sa Banat News nga si Senior Inspector Jaime Santillan miingon nga wala kini nadawat nga communication o text message bahin niini.  Bisan ang iyang desk officer walay nadawat nga komunikasyon gikan sa CPPO.

“Unsaon man nako pag-adto nga wala man ko’y nadawat nga communication, bisan text, letter wala g’yud, ambot og ngano,” sigun pa ni Santillan. Gipasabot ni Santillan nga wala siya’y intensyon nga likayan ang drug test gumikan wa ‘sab kini nasayod niini.

Ang Banat News misuway unta og tawag sa mga telephone number sa kapulisan sa lungsod sa Tudela ug Poro, apan pakyas kini nga makaestablisar og tawag.

Atol sa gihimo nga surprise drug test sa mga station chiefs walay nagpositibo niini. (BANAT NEWS)