Bata naanod
CEBU, Philippines - Usa ka 16-anyos nga bayong-bayong ang na-missing human naanod sa sulog samtang nangaligo kagahapon sa hapon uban sa iyang mga classmate diha sa bukana sa Guadalupe River sa Barangay Pasil, Cebu City.
Ang na-missing mao si Rowen Abellanida, 16, taga dalan Figueroa, Sawang Calero, dakbayan sa Sugbo.
Si Simeon Romarate executive director sa City Risk Reduction Management Council (CRRMC) mibutyag sa Banat News nga si Abellanida tinun-an sa Gothong National High School nangaligo kauban sa iyang mga classmates human sa ilang klase.
Ang mga kauban sa biktima giila nga sila si Charice Betalmos, 15, Rolly Prajes, 16, Warren Nazareno, 16, Reynante Mariquit, 16, ug Archel Antigua, 15.
Matud ni Romarate nga naabtan sa kusog kaayong uwan ug bul-og sa tubig gikan sa ibabaw sa suba ug gianod padung sa dagat. Nag-iyahay og luwas sa ilang mga kauban ang mga bata apan si Abellanida nga miluwas kang Nazareno maoy napuli pagtidlom ug wa na molutaw pa. Gilusad na ang search and rescue operation atol ning pagbalita.
Usa ka gibana-banang 60-anyos lola ang gi-rescue sa mga sakop sa CDRRMC dihang ang ilang balay sa Sitio Magtalisay, Barangay Mabolo nasanapan na kini sa tubig matud pa ni Harold Alcontin sa CDRRMC.
Samtang duha ka balay ang nakaangkon og danyos human naligiran sa midahiling yuta sa Campo 5, Barangay Manipis, Talisay City kagahapon sa buntag.
Usa sa mga biktima, si Julita Hipulan, 38, miingon nga ang ilang balay naigo gayud sa dako nga bato ug naigo usab ang panimalay ni Josefina, 70. (BANAT NEWS)
- Latest
