Tulo ka Station chief paesplikahon

CEBU, Philippines - Patubagon ni Cebu Provincial Police Office director Senior Superintendent Noel Gillamac ang mga police chiefs sa lungsod sa Compostela, Carmen ug Sogod tungod sa pagpanglungkab sa mga munisipyo sa tulo ka lungsod.

Gikasagmuyo ni Gillamac nganong walay nakabantay kanila sa paglungkab sa treasurer’s office sa maong mga lungsod nga duol ra man kini sa ilang mga buhatan.

Hinuon dunay pagduda si Gillamac nga inside job ang  nahitabo. Ang hepe sa lungsod sa Sogod, Insp. Romeo Caacoy nga nahinabi sa mga tigbalita mibutyag nga duna na sila’y gidudahan apan nagtigom pa sila og ebidensiya.

Nasayran nga mokabat sa 170 mil ka pesos  ang nadala sa mga kawatan nga nakabiktima sa tulo ka mga lungsod, diin gisubay sab sa kapulisan kung dili ba konektado ang tulo ka mga tulis sa usa lang ka grupo. (BANAT NEWS)