Shootout usa patay

CEBU, Philippines - Patay ang usa ka lalaki nga duna’y pending nga warrant of arrest sa kaso sa drugas, human kini gialarma sa kapulisan nga armado ug misukol sa mirespondeng mga sakop sa Special Weapons and Tactics (SWAT) sa Cebu City Police Office (CCPO), kagahapon sa hapon diha sa Sitio Upper Manol, Tisa, Cebu City. Dead on the spot si Alvin Parba, human kini gikatahong misukol sa kapulisan, apan ang mga ginikanan sa suspek mitiyabaw nga “rubout” ang nahitabo.

Usa ka 357 revolver nga gituohang gigamit sa suspek nga dunay sulod nga mga bala ang nakuha diha sa crime scene.

Ang mga sakop sa SWAT ang unang miresponde sa usa ka tawag sa telepono gikan sa usa ka residente sa lugar may labot sa usa ka armadong tawo, apan ang mga polis wala magtoo nga usa sa mga nalista nga drug personality dinhi sa Sugbo ang tawong ilang girespondehan.

Matud pa ni Superintendent Romeo Santander ang hepe sa City Intelligence Branch, igo lang mibalos ang mga polis human nga giunhan kini og pusil sa suspek, naigo sa dughan si Parba nga nakaingon sa iyang kamatayon. Sumala pa ni Santander nakabantay si Parba maong midagan nga nagbitbit og armas dayon mitago sa balay sa ilang silingan nga si Elmer Quibite ug gikan didto gikatahong nakigpinusilay kini sa mga polis.

Matud pa ni Santander nga ilang nasubay nga dunay pending nga kaso sa drugas ug ilaha na kini gi- buy-bust sa nakalabay nga tuig apan nakaeskapo apan nalutsan gihapon kini og warrant of arrest gikan ni RTC Branch 21 Judge Eric Menchavez.

Ang imbestigador sa Homicide Section SPO4 Rey Cuyos miingon nga naigo sa dughan si Parba. Narekober sa kapulisan sa crime scene ang basiyo sa bala sa .9mm ug tulo ka basiyo sa M4.

Ang mga ginikanan sa biktima mireklamo nga walay nahitabong shootout sa maong insidente. Matud pa sa inahan nga gikan lang sa bulangan ang iyang anak dihang kini gipusil sa mga polis. Nagpadayon pa ang imbestigasyon sa kapulisan may labot sa maong insidente. (BANAT NEWS)