Traffic violations sa Mandaue nidaghan

CEBU, Philippines- Mas nidaghan ang drayber nga malapason sa lagda sa trapiko nga nadakpan sa dakbayan sa Mandaue sa buwan sa Hulyo itandi sa Hunyo ning tuiga.

Kini human ang mga traffic enforcers nakadakop og 5,142 ka kalapasan sa Hulyo nga sobra pa sa doble ang gidaghanon sa buwan sa Hunyo.

Base sa talaan sa Traffic Enforcement Agency of Mandaue (TEAM) nga gipangulohan ni Edwin Ermac, 2,119 lang ka kalapasan ang natala sa buwan sa Hunyo.

Gibahig hinuon sa nagkadaiyang kalapasan nga nahimo sa mga drayber nga naglakip sa traysikad, public utility jeepney (PUJ), traysikol, taxi  ug mga pribadong sakyanan nga molabay sa mga dalan sa dakbayan sa Mandaue.

Naglakip sa pipila ka mga kalapasan nga nahimo ang, no entry, obstruction ug ang wala pagsubay sa tukma  nilang rota alang sa mga PUJ.

Dugang nahimong kalapasan sa mga drayber mao ang expire nga prangkisa, rehistro  sa sakyanan, lisensiya sa pagmaneho ug nakahimo pa gyud og laing kalapasan sa lagda nga gilatid sa trapiko nga moresulta na hinuon sa pagkasikop niini.

Multa nga P200 ang gipahamtang sa mga nadakpan kinsa na-isyuhan og citation ticket. - /GMR) (BANAT NEWS)