Negosyo nga bas ug graba gihimakak sa kapitan

CEBU, Philippines- Gihimakak sa kapitan sa barangay Bonbon, dakbayan sa Sugbo ang report nga duna siya’y kalambigitan sa pagpangubkob og bas ug graba sa ilang barangay tungod kay giingong siya mismo ang nagnegosyo niini.

Si Kapitan Eduardo Cabriana kinsa mibisita sa buhatan ni Bise Mayor Edgardo Labella mihimakak sa pasangil batok kaniya.

Apan matud ni Cabriana nga nakakuha gyud sila og bas ug graba gikan sa sapa diin gigamit nila kini sa proyekto sa ilang barangay.

Gibutyag usab sa kapitan nga dunay mga residente nga mangubkob gyud og bas ug graba diha sa sapa tungod kay gihimo man nila kining panginabuhian.

Matud sa kapitan nga pwede niyang mapahunong ang pagpangubkob diha sa sapa apan kinahanglan usab nga dunay laing panginabuhian ang mga residente aron dili magutman ang mga pamilya niini.

Si Cabriana nangayo og tabang kang Labella kabahin sa panginabuhian sa mga residenteng nagsalig og pangubkob sa sapa aron kini mohunong.

Gibutyag ni Cabriana nga dugay na’ng nagpahigayun og pangubkob diha sa sapa ang maong mga residente diin wala pa siya ma-kagawad sa barangay ug hangtud karon nga na kapitan na lang siya.

Dugang ni Cabriana nga ang ubang barangay magkuhaan usab og mga bas ug graba diha sa sapa sa Bonbon alang sa ilang mga proyekto sama sa barangay Babag, Pung-ol Sibugay, Malubog, Tap-tap, Sirao ug Sudlon. - /GMR) (BANAT NEWS)