Dalaga gitulis, dughan gihikap
CEBU, Philippines- Gihikap ang dughan sa babaye sa armadong lalaki nga mitulis kaniya alas 12 pasado sa tungang gabii niadtong Domingo sa Poblacion, lungsod sa Liloan.
Si PO2 Eric Pintoy sa Liloan Police Station miila sa biktima nga si Cherry Ann Delin, 21-anyos, production worker sa Cebu Mitsumi Industries.
Matud ni Pintoy nga naglakaw pauli sa ilang panimalay ang biktima gikan sa iyang trabaho sa Mitsumi sa Sabang, dakbayan sa Danao dihang kalit lang gihunongan og motorsiklo.
Miibot og armas ang wala hiilhing lalaki ug gition ngadto sa biktima dungan ang pagdeklarar nga tulis ug gipangayo ang gidalang alahas, cellphone ug pitaka.
Si Pintoy miingon nga gumikan sa kahadlok sa biktima, daling gihatag ang iyang cellphone ug salapi nga P150 nga maoy sulod sa pitaka.
Ang wala hiilhing lalaki nga daw nasuko sa gamay’ng kantidad nga iyang nadawat daling nagpanghikap sa dughan sa biktima sa pagtuo nga gitagoan ang uban pa’ng salapi nga dala niini.
Dihang naseguro na gyud sa tulisan nga wala’y laing dalang kuwarta ang biktima, dali kining mipabulhot sa pagpadagan sa motorsiklo padulong sa bukirang bahin sa lungsod. - /GMR) (BANAT NEWS)
- Latest
