Tulo ka Indian nangawat og iro

CEBU, Philippines- Pasakaan og kasong pagpangawat ang tulo ka Indian nga nangawat sa iro nga Shitzsu princess type nga nagkantidad og P25,000 nga gipanag-iya ni Konsehal Doroteo Emit sa dakbayan sa Talisay.

Ang pagpangawat nahitabo niadtong Domingo sa gabii sulod mismo sa Aqua Cainta Resort nga gipanag-iya sa konsehal.

Ang mga suspetsado nailhan nga sila si Rajinder Singh, Gurinderpal Singh ug Bhanot Deepak, mga regular customers sa maong resort.

Si Emit kinsa personal nga mitaho sa insidente sa Talisay City Police Station mibutyag human iyang nasayran nga nawala ang iyang iro, dali dayong gitan-aw ang CCTV camera ug iyang nakita ang mga suspetsado nga maoy nagkuha sa ilang iro.

"Kaila na baya mi ani nila kay sige mani sila og ligo sa among resort pero ila gyud nga gituyuan," matud pa sa anak sa konsehal nga si Gennie Jean Emit.

Matud ni SPO1 Mikie Espina nga nakita sa CCTV camera lima ka Indian apan tulo lang ang nagkuha sa iro.

Si Espina ug kaubanan kagahapon sa buntag ilang gipangita si Rajinder nga nagpuyo sa Villa Solana, dili layo sa maong resort.

Matud ni Espina nga si Rajinder mao usab mitabang kanila sa pagtudlo sa nahimutangan sa kauban niyang Indian diin duha niini nagpuyo sa Marigondon, dakbayan sa Lapu-Lapu.

Sa pag-adto nila sa dakbayan, wala nila nakita ang maong iro.

Matud ni Rajinder nga dili nila intensyon nga kuhaon ang iro  kay hubog sila atong panahona.

Dason ni Rajinder nga nawala na ang maong iro tungod kay milayat kini sa ilang motorsiklo nga gisakyan pag-agi nila sa Marcelo Fernan Bridge.

Human nasayri sa pamilyang Emit ang panghitabo, matud pa ni Gennie Jean nga ang iyang inahan nagsige og hilak ug ila pa gyud nakita sa CCTV nga gipatiran ang iro sa mga suspetsado.

"Dili man gani mi mubun-og sa iro bisag unsa pa iyang gub-on nga butang," matud pa ni Gennie.

Dason ni Gennie nga ang ilang pamilya mopasaka gyud og kaso batok sa mga suspetsado. - /GMR) (BANAT NEWS)