Nanukmag gitigbas patay
CEBU, Philippines - Patay ang usa ka lalaki human kini gitigbas sa amahan sa lalaki nga iyang gisumbag sa Barangay Piyo, Tabugon sa miaging gabii.
Ang biktima naila nga si Elmo Hortelano, molupyo sa Barangay Maslog sa lungsod sa Tabogon. Samtang ang suspetsado naila nga si Julito Brigoli, 44, molupyo sa Maslog, sa Tabogon kinsa mitahan sa kapolisan human sa hitabo.
Base sa imbestigasyon sa kapolisan nga ang biktima ug ang suspetsado gikan nga nag-inom atubangan sa merkado sa Tabogon.
Apan human sa ilang panag-inom miuli sila sa ilang tagsa-tagsa ka panimalay apan kalit lang gisumbag sa biktima ang anak sa suspetsado.
Ang suspetsado nga nakakita sa biktima nga gisumbag ang iyang anak daling miduol nga nagdala og sundang ug gitigbas kini pipila ka higayon hinungdan nga nakaangkon kini og grabeng samad sa lawas.
Daling gidala ang biktima sa Severo Verallo Hospital sa dakbayan sa Bogo apan gideklarar na kini nga dead on arrival. (BANAT NEWS)
- Latest
