‘Cop killer’ napatay

CEBU, Philippines - Napatay sa kapolisan sa Guindulman, Bohol human sa shoot-out sa miaging gabii sulod sa usa ka pasaheroang bus ang suspetsado sa pagpusil sa upat ka polis sa Provincial Intelligence Branch sa Bohol, duha ka polis naangol.

Ang napatay mao si Artemio Tare Jr., kinsa giingong nakigpinusilay sa kapolisan sa Guindulman pasado alas 9:00 sa miaging gabii.

Si Police Officer Two Aldrin Asielo, desk officer sa Guindulman Police Station nga nahinabi sa Banat News miingon nga nagpahigayon og synchronized checkpoint ang Bohol Provincial Police Office (BPPO) sa miaging gabii pinangulohan ni Senior Inspector Joemar Pomarejos.

Sumala pa nga gipara nila sa Barangay Tabajan, ang usa ka bus aron susihon ang mga pasahero. Sila si PO1 Joel Bayron ug PO1 Jeremias Platino  misaka sa bus apan nakabantay ang duha sa ikatulong lingkoranan sa tuong bahin sa likod nga may usa ka lalaking nagsul-ob og kalo nga gipayongyong sa iyang nawong.

Gisitar kini ni Platino apan gikatahong kalit kining mipusil sa mga polis hinungdan sa pagkaigo ni Platino sa tiyan ug natapsingan sa tiil si Bayron apan bisan samdan, nakiglayog si Platino sa suspek aron ilogon ang armas sa suspek.

Ang ubang mga polis pagkadungog sa butobuto daling misaka sa bus ug gipusil ang lalaking nakiglayog ni Platino ug maayong pagka-igo sa ulo niini nga nakaingon sa iyang kamatayon.

Narekober sa kapolisan ang usa ka kalibre. 45 nga giluklok sa atubangang bahin sa iyang tiyan nga may pito ka bala, usa ka .357 nga may mga bala, usa ka gamay’ng pakete nga gituohang shabu, ug usa ka deformed slug diha sud sa bus.

Nakakuha ‘sab ang mga polis og peke nga Regional Intelligence Division ID gikan sa suspek nga may markang Intelligence Agent One, Professional Drivers license, Alumni ID, sim card, salapi nga P470.

Nasuta gikan sa mga identification cards nga nakuha sa suspek nga siya diay si Artemio Tare Jr. ang suspek sa kamatayon ni PO1 Michael June Ejoc ug sa pagkasamad sa laing tulo pa ka polis sa Tagbilaran City niadtong Biyernes sa buntag.

Gidala sa tambalanan ang suspek apan gideklarar na kini nga dead on arrival ni Dr. Winefredo Liao, Municipal Health Officer sa Guindulman, Bohol. (BANAT NEWS)