Karsada giparkingan na ‘sab

CEBU, Philippines - Puwerte na usab ang pagsiaw sa mga tag-iya’g passenger jeepneys ug ubang sakyanan nga anha pabuntagi sa karsada. Kini tungod kay naluya ang CITOM sa paghimo’g kampanya.

Usa sa mga karsada nga hilabihan kadaghan nga nagparking nga mga sakyanan mao ang dapit sa eskena V. Rama ug P. del Rosario Extention nga kapin sa 10 ka PUJ nga anha ra pabuntagi.

Sa pakisusi nga gihimo sa Banat Manobela nahibaw-an nga usa ka mayor ang tag-iya sa mao nga mga PUJ’s ug aduna kini grahe sa mao nga dapit apan dili na masulod ang tanan niyang sakyanan.

Usa ka kawani sa duol nga gasoline station miingon nga ang mga sakop sa CITOM magpanuko sa pagdakop sa mao nga mga sakyanan kay gipanag-iya kini og mayor sa usa ka lungsod sa habagatang Sugbo. “Mao lagi ni makadaot sa gobiyerno sir kay kampanya karon, inigka-ugma wala na unya pili-pilion lang ang ilang pangdakpon. Kana nga mga PUJ kanunay man na nga iparking diha sa karsada,” matud sa informer.

Naagian sa Banat Manobela ang mao nga lugar sa V. Rama Avenue ala-una sa kaadlawon kaniadtong Biyernes. (BANAT NEWS)