Mananga River angay’ng panalipdan

CEBU, Philippines - Giawhag ni Bise Mayor Edgardo Labella ang kapitan sa Barangay Bonbon nga ilhon kon kinsa ang mga tawo nga nalambigit sa ilegal quarry operations sa Mananga River nga nakaingon nga dili na lig-on ang tulay sa mao nga dapit.

Gisuwatan ni Labella si Kapitan Eduardo Cabriana ug giawhag nga mohimo siya og pakisusi aron mabadlong ang mga tawo nga nakaingon sa kadaot sa sapa.

Gibisitahan ni Labella ang Barangay Bonbon kaniadto’ng Martes human siya makadawat og taho nga dunay ilegal nga pagpanguha og bas ingon man graba sa mao nga dapit. Nakita mismo ni Labella nga adunay nagkabkab sa kilid sa sapa nga nakahatag og kadaot sa kalig-on sa taytayan nga gigastohan og P13 milyones.

Daghan sa taga Barangay Bonbon nanginabuhi sa pagpanguha og graba ingon man bas gikan sa sapa aron ibaligya sa mga construction company.

Gipasabot ni Labella nga ang padayon nga pagpangubkob sa sapa makapalapad sa agianan sa tubig ug makawagtang sa tubig.  (BANAT NEWS)