Internet café sulod sa balay nasunog

CEBU, Philippines - Nasunog ang internet cafe sulod sa usa ka balay kagahapon sa buntag sa sitio Mustang, barangay Pusok, dakbayan sa Lapu-Lapu human nibuto ang usa sa mga electric wires nga nakakonekta sa main switch.

Matud ni PO2 Emmanuel Dariada sa Lapu-Lapu City Police Office  Station 5 nga gipanag-iya ni Juanita Patalinjug ang internet cafe ug ang iyang pamilya nagpuyo sa ikaduhang andana sa maong balay.

Nahitabo ang sunog alas 5:27 samtang nangatulog pa ang pamilya ni Patalinjug.

Ang silingan nga si Engr. Jesus Laurino ang nakabantay nga nasunog ang balay ug daling gipukaw si Patalinjug kinsa daling namukaw sa iyang bana nga si Hernando ug duha ka anak nga sila si Jerard ug Gregorio.

Si Senior Fire Officer 2 Berido Atilano sa Lapu-Lapu City Fire Department ang daling nakaresponde sa sunog ug gisalbar ang pamilya pinaagi sa pagguba sa bongbong sa ilang silingan. Wala’y naangol sa pamilya apan P300,000 ang danyos nga gibilin sa sunog. (/GMR)(BANAT NEWS)