Pagtapon ok ra — Osmeña

CEBU, Philippines - Si kanhi Cebu City south district kongresista Tomas Osmeña nagkanayon nga “survival” ang pagtapon sa pito ka mga kapitan aron dili mag-antos ang ilang mga molupyo.

Si Osmeña nga nahinabi sa mga tigbalita nagkanayon nga misabot siya sa mga kapitan tungod kay kini alang sa kaayohan sa ilang konstituwente.

“For me it’s really a matter of survival for them…The mayor has been so vindictive that he is not releasing anything to them and they had suffered so much because they are identified with BOPK (Bando Osmeña Pundok Kauswagan) I understand, you tell them I still love them,” ni Osmeña pa.

Matud niya nga dili siya buot mag-antos pa ang maong mga kapitan tungod lang niya.

Ang nahisgutang mga kapitan nga mitapon sa Team Rama mao sila si Orlan Herrera sa Barangay Guba, Maria Velasquez sa Pulangbato, Nerissa Antolihao sa Budlaan, Zenaida Colina sa Bacayan, Manny Pepito sa Mabini, Casimiro Pilones sa Paril ug Winefredo Macario sa Sudlon II.

Subay niini, gihangop ni Mayor Michael Rama ang pagtapon sa nahisgutang pito ka kapitan ngadto sa Team Rama nga bag-ohay lang mibisita kaniya. Si Rama miawhag sa maong mga kapitan sa pagsuporta sa tanang proyekto sa administrasyon karon alang sa kaayohan sa mga molupyo sa dakbayan sa Sugbo.

Giawhag usab ni Rama ang ubang mga kapitan ug konsehal nga kaalyado sa BOPK nga mosuporta usab sa mga proyekto ug programa karon sa siyudad. (/EIM)(BANAT NEWS)