Hangyo sa taga Labangon ipa-esplikar
CEBU, Philippines - Gikatakdang ipatawag sa konseho sa dakbayan sa Sugbo ang kapitan sa barangay Labangon aron pa-esplikahon sa ilang hangyo sa pagdonar sa luna nga nahimutangan sa ilang merkado, barangay hall ug gym. Si Konsehal Margot Osmeña ang misugyot sa pagpatawag sa kapitan.
Sa report sa Committee on Markets namatikdan nga ang resolusyon nga gipalabang sa barangay wala’y gilakip nga bisan unsa nga dokumento kabahin sa pagpanag-iya, gilapdon ug boundary sa luna aron unta basehan sa deliberasyon sa konseho.
Ang Committee on Market mirekomendar sa pagduso sa maong sugyot ngadto sa City Treasurer’s Office, Cebu City Market Authority ug General Services Office sa pagpahigayon og mas lapad nga pagtuon nga maoy himuong giya sa konseho sa ilang desisyon. Niadtong Hunyo 5, ang konseho sa barangay mipalabang og resolusyon kabahin sa ilang hangyo sa siyudad.
Base sa maong resolusyon nga ang lote nga nahimutangan sa merkado, lakip na sa barangay hall ug gym nakarehistro sa pangan sa siyudad.
Buot sa barangay nga makabaton og luna nga magamit sa publiko. (BANAT NEWS)
- Latest
