Buhis sa Mandaue doblehon sunod tuig
CEBU, Philippines - Ipatuman sa dakbayan sa Mandaue ang dobleng usbaw sa real property tax ug business tax karong Enero sunod tuig.
Si Mandaue City Treasurer, Atty. Regal Oliva, atubangan sa mga magpapatigayun ug mga barangay kapitan sa public hearing nga gipahigayon kagahapon, nipasabot nga kamandoan sa Department of Finance ang ilang ipatuman.
Matud ni Oliva nga ang kapakyas sa ilang pagpatuman sa maong kamandoan moresulta sa ilang pag-atubang og kaso o kaha pagka-suspenso sa katungdanan.
Gipasabot ni Oliva nga ilang ipatuman ang 100 percent nga usbaw sa buhis sa anam-anam nga paagi hangtud sa lima ka tuig alang sa real property tax ug tulo ka tuig sa business tax.
Kini nagpasabot nga 20 porsiyentong usbaw ilang ipatuman sugod Enero 2015 alang sa real property tax ug renewal sa business permit.
Dugang ni Oliva nga lakip sa maapektohan nga adunay 20 porsiyentong usab ang amusement tax nga naglakip sa mga balay kahilayan, mga pasundayag ug kalingawan ug uban pa.
Si Edna Tan nga representante sa JoyLand Industries nga nahinabi sa Banat News miingon nga ang ipatuman nga usbaw sa buhis sa kagamhanan dili makahatag og dakung epekto sa kalidad sa ilang negosyo gawas lang kon masinati usab nila ang pag-usbaw sa materyales nga gikinahanglan sa ilang produkto.
Si Konsehal Diosdado Suico nga maoy chairman sa committee on finance and appropriation sa konseho nipahibawo nga human sa maong public hearing, ilang aprobahan ang ordinansahon alang sa pagpausbaw sa buhis. (BANAT NEWS)
- Latest
