Mga kabus sa Mandaue may PhilHealth na
CEBU, Philippines- Mahimo na karong libre ang pagpa-check up ug pagpatambal sa labing kabus nga molupyo sa 27 ka barangay sa dakbayan sa Mandaue tungod sa pagpasakop kanila sa PhilHealth Insurance program.
Kini ang nasayran sa Banat News kang Cherry Ruiz nga maoy Social Insurance Officer sa PhilHealth nga nadestino sa dakbayan.
Si Ruiz maoy kauban ni Mayor Jonas Cortes, Umapad Barangay Kapitan Nelson Rubio ug mga opisyal sa dakbayan sa pagtunol kagahapon sa ilang Member Data Records (MDR) nga maoy magmatuod sa ilang pagpasakop sa PhilHealth Insurance sa kagamhanan.
Matud pa ni Ruiz nga ang labing kabus sa dakbayan nga ilang gipasakop sa PhilHealth Insurance ilang nakuha gikan sa gipahigayong National Housing Targeting System nga gipasiugdahan sa Department of Social Welfare and Development-7.
Dugang pa niya nga ang labing kabus nga ilang gipasakop sa PhilHealth wala’y balayranan sa pagpa-check-up ug pagpatambal sa tanang hospital nga gipadagan sa kagamhanan.
Gipasabot ni Ruiz nga makabayad lang ang miyembro kon adto sila magpatambal o magpa-check-up sa pribadong tambalanan tungod kay may kaugalingon man usab silang pamaagi ang mga nagdumala niini.
Gitataw ni Ruiz nga ang mga beneficiaries sa matag sakop sa pamilya nga makapahimulos sa PhilHealth Insurance mao kadtong sakop sa pamilya nga 20 anyos paubos nga wala’y trabaho ug wala pa usab maminyo. - /GMR) (BANAT NEWS)
- Latest
