Target nakaipsot, kapuyo ang nasikop

CEBU, Philippines- Naka-ipsot sa kamot sa balaud ang usa ka “level 3” drug pusher apan nasikop ang iyang kapuyo nga nakuhaan og daghang drugas, atol sa buy bust operation sa City Intelligence Branch (CIB) sa Cebu City Police Office (CCPO) sa Rotunda, barangay Calamba.

Mga text messages ang nagtudlo sa mga operatiba sa ilegal nga kalihukan sa maong lugar hinungdan nga gilusad ang surveillance operation.

Matud ni Supt. Romeo Santander, hepe sa CIB, nga human nagpositibo ang ilang pag-monitor, ila dayon gilusad ang buy-bust operation pasado alas 7 sa miaging gabii. Target sa mga operatiba ang usa ka Edgar Potot nga abtik nga naka-atik sa mga polis apan nahabilin ang iyang live-in partner nga si Mercedita Survilla, 42.

Nakuha sa kapolisan gikan sa dinakpan ang 53 ka gagmay nga pakete ug usa ka medium size nga drugas nga duna’y kantidad nga P20 mil ug P1,620 nga gituohang halin sa ilang ilegal nga negosyo. Gibalhug na sa CCPO detention cell si Survilla samtang padayon pa nga gipangita si Potot nga parehong mag-atubang og kasong paghupot ug pagbaligya sa ilegal nga drugas. - /GMR) (BANAT NEWS)