Tejero gipaubos sa state of calamity

CEBU, Philippines- Gipaubos sa state of calamity ang barangay Tejero, dakbayan sa Sugbo human dakung sunog ang miulbo alas 5:10 kagahapon sa sayong kabuntagon.

Matud ni Konsehal Garry Lao nga ilang nasabutan nga ideklarar nga ubos sa state of calamity ang ilang lugar aron dali magamit ang ilang calamity fund sa pagtabang sa mga biktima.

Ang gymnasium sa ilang barangay ang usa sa mga evacuation center nga ilang gigahin alang sa mga nasunogan apan ang mga tawo igo lang mibalhin sa usa ka bakanteng luna duol sa lugar nga nasunogan. Gipasabot ni Lao nga dili nila mapugos ang mga tawo nga mobalhin sa gymnasium.

Nasayran gikan sa kabomberohan nga moabot sa 20 ka panimalay apektado sa sunog sa Sitio Blessed Sacrament, Villagonzalo II, sa maong barangay diin 16 ang naugdaw.

Apan sa natala sa Department of Social Welfare and Services (DSWS) ug sa barangay, 32 ka balay ang apektado nga adunay 84 ka pamilya ug 278 ka indibidwal. Sumala pa ni SFO3 Roylin Maratas sa Bureau of Fire Protection (BFP) nga alas 5:10 ilang nadawat ang alarma sa sunog ug nakontrolar sa 25 minutos ug miabot sa task force alpha ang alarma sa maong sunog. Ang panimalay ni Renaldo Lañas ang gitudlo sa mga residente diin nagsugod ang sunog.

Sumala pa ni Maratas nga posibleng ang gipasiga nga kandila nga nabiyaan ang hinungdan sa sunog gumikan kay wala’y kuryente ang maong panimalay.

Kini usab ang gikompirmar ni Lao.

Matud ni Lao nga duha ka semana na ang nakalabay giputlan sa kuryente ang maong lugar human nasuta nga dagha’ng mga balay sa maong dapit ang naghimo og illegal tapping. Samtang ang BFP nagtinguha nga ipatawag ang tag-iya sa balay nga gitudlo nga didto nagsugod ang sunog aron ma-estorya kung unsa katinuod ang pasangil sa iyang mga silingan. - /GMR) (BANAT NEWS)