Palma pabor pamutlon ang mga kahoy sa South

CEBU, Philippines- Taliwa sa mga mibabag alang sa pagputol sa mga karaang kahoy sa siyudad sa Naga, San Fernando ug dakbayan sa Carcar dakong uyon si Cebu Archbishop Jose Palma nga putlon na ang maong mga kahoy tungod kay risgo na kini sa kinabuhi sa tawo gumikan kay gabok na ang mga punoan sa acacia sa maong mga lugar.

Usa sa gihimong basehan ni Archbishop Palma kadtong pagkatumba sa usa ka dakong kahoy sa Barangay Zapatera siyudad sa Sugbo nga mikalas sa kinabuhi sa usa ka driver.

Matud sa Arsobispo nga dako ang iyang respeto sa adbokasiya sa mga environmentalist ug ni running priest nga si Father Robert Reyes kay alang kaniya mao kini ang maayo apan iyang gihimug-atan nga gikinahanglan usab nga timbang-timbangon ang sitwasyon.

Kahinumdoman  nga si Father Reyes mitandi sa mga kahoy sama sa usa ka tawo nga kon pamutlon ang mga masakiton ug karaang kahoy, susama ra kini sa gipamatay na ang mga masakiton ug tiguwang nga mga tawo.

Sa isyu sa road widening, gipadayag ni Palma nga angay usab tun-an og maayo ang laing pamaagi gawas sa pagputol sa mga kahoy. Alang kaniya mas labing maayo kon maghimo og laing karsada aron kapanalipdan ang mga dagkong kahoy.

Nasayran nga kasamtangan unang gipahunong ang pagpamutol sa mga karaan ug dagkong kahoy human si DENR Sec. Ramon Paje mipagawas og kamanduan nga i-recall ang special tree cutting permit nga giisyu niini. - /EIM)(BANAT NEWS)