Pasil vendors nagpatabang sa siyudad

CEBU, Philippines- Nagpakisayod ang mga sakop sa Suba Pasil Market Retailers Association, Pasil Market Phase II Cooperative sa kagamhanan sa siyudad sa Sugbo kon unsa’y plano ngadto kanila ug sa phase II building nga ilang giokupahan.

Ang grupo mipadangat og suwat ngadto kang Konsehal Alvin Arcilla kinsa mao’y chairman sa committee on market sa konseho sa siyudad.

Ang mga stallholders ug retailers sa Suba Pasil Market nag-okupar karon sa phase II building sa merkado. Matud sa mga vendors nga human sa nahitabong kalamidad nag-antos sila dihang grabeng nadaut ang merkado. Ang kagamhanan sa siyudad nagdili sa mga vendors sa pagbalik sa ilang pwesto ug gibalhin sila sa fish port duol sa dagat.

Ang mga vendors giingong maoy migasto sa pagpataud og suga sa ilang mga pwesto, pagbutang og temporaryong mga stalls, ug paglimpiyo sa lugar.

Nasuta sa mga vendors nga ang phase II building sa merkado magamit pa hinungdan nga mibalhin sila sa maong lugar.

Sila usab ang namalit og water pump ug mipaayo sa pansayan ug mibayad og tawo nga molimpiyo sa palibot. Ang mga vendors nagkanayon nga dili na nila masuportahan pa ang ubang gastohan sa pagpaayo ug pagmintinar sa building nga ilang giokupahan hinungdang nangayo na sila og tabang sa siyudad. Ang konseho sa siyudad gikatakdang mopahigayon og executive session karong Septiyembre 10 kabahin sa maong problema. - /GMR) (BANAT NEWS)