Tulo ka barko, 64 ka tripulante nasikop

CEBU, Philippines- Moabot sa 64 ka tawo nga ilegal nga nanagat sulod sa kadagatan sa lungsod sa Santa Fe, isla sa Bantayan ug nakuhaan og mga corals ang gipangsikop  niadtong Sabado sa kadlawon.

Ang nisikop mao ang hiniusang pwersa sa Cebu Provincial Anti-Illegal Fishing Task Force, Daanbantayan Bantay Dagat ug Naval Forces Central.

Matud sa hepe sa task force, Loy Madrigal, nga tulo ka sakyanan sa kadagatan ang ilang nasikop ug usa niini cargo vessel nga dunay dala nga mga lain-laing klase sa sea corals, smooth top shells ug giant clamps nga gidili sa balaud.

Sumala pa ni Madrigal nga alas tres sa kadlawon ila unang nasikop ang F/V Rosalinda nga nanagat sulod sa kadagatan sa Santa Fe.

Alas 4 sa kadlawon ilang nasikop ang F/V RAV 1 samtang pipila ka oras usab nasikop ang usa ka cargo vessel nga MT/ Lourvie nga duna’y karga nga mga giants shells, smooth top shells ug mga corals.

Ang F/V Rosalinda adunay sakay nga 26 ka tripulante ug gipanag- iya sa kanhi mayor sa San Remigio, konsehal Pablito Olivar, nga nakuhaan og 77 ka banyera nga isda sa kantidad nga P30 mil.

Ang F/V RAV 1 dunay sakay nga 26 ka tripulante nga   gipanag-iya ni Engr. Romeo Villaceran ang nakuhaan usab og tulo ka banyera nga isda ug ang MT/ Lourvie adunay sakay nga 12 ka mga tripulante.

Matud ni Madrigal nga usa ka hangyo ang ilang nadawat gikan sa mga lungsod sa pag-monitor sa kadagatan human  mga dagkung barkong panagatan ang nasigpatan sa lugar.

Karong adlawa gikatakda nga ipaubos sa inquest proceedings ang mga dinakpan aron pormal nga mapasakaan og kaso. - /GMR) (BANAT NEWS)