Hain ang ubang senior citizens?

CEBU, Philippines - Daghan gihapon nga mga senior citizens dinhi sa dakbayan sa Sugbo ang wala makakobra sa gipanghatag nga tag P2 mil nga cash assistance gikan sa City Hall kagahapon.

Wala moadto sa mga Barangay Hall ug Sports Complex ang mao nga mga senior citizens hangtod nga miabot na lang ang alas 12 sa udto ug nakapalig-on sa pagtuo nga ang uban kanila wala gayud magpuyo dinhi sa dakbayan.

Si City Administrator Lucelle Mercado miingon nga kadtong mga senior citizens nga wala makakobra kagahapon makahimo pa pagkobra hangtud sa katapusan sa buwan. Ang lagda nga gipatuman sa City Hall mao nga napulo ka “working days” gikan sa adlaw sa pagpanghatag sa cash assistance ug dili lang gihapon makuha dili na ihatag pa sa mga hingtungdan.

Daghan ang nagtuo nga kadto’ng mga senior citizens nga tua na magpuyo sa lagyo nga lugar wala na lang moanhi pa kay hasolan nga gamay ra ang kantidad nga ilang makuha.

Si City Treasurer Diwa Cuevas miingon nga kapin sa 58 mil ka senior citizens ang narehestro dinhi sa dakbayan ug makadawat unta og tag P2 mil nga benepisyo.

Wala dayon masuta kon pila ang tanang senior citizens nga wala makakobra sa ilang cash assistance kagahapon.

Kadto’ng nakadawat kagahapon, tangkod na nga P5 mil ang ilang nadawat gikan sa dakbayan sa Sugbo. Matud ni City Administrator Mercado nga ang nahabilin nga P7 mil nga kobrahonon karong tuiga sa mga seniors, anam-anamon lang sa paghatag.

Gipahibalo na nga karong tuiga ang matag senior citizens makadawat na og tag P12 mil nga cash assistance gikan sa dakbayan.  (BANAT NEWS)