Amerikano, duha ka kauban sikop sa raid

CEBU, Philippines - Nasikop sa kapolisan sa Carbon ang tulo ka tawo lakip na sa usa ka langyaw atol sa pag-serve sa usa ka warrant of arrest sa usa ka pinangita sa balaod dihang sila naaktohan nga nagsuyop og drugas sa eskina sa Dalan Pelaez ug Sanciangko sa dakbayan sa Sugbo kagahapon sa alas 6:30 sa buntag.

Ang nasikop naila nga sila si Alexander Lastimoso, 32, taga Ward 4, Minglanilla  nga may warrant of arrest sa kasong robbery nga giluwatan ni RTC Branch 23 Judge Generoso Labra.

Atol sa pagsikop kaniya, naaktohan usab sila si Rona-Laun Lastimoso, 30, ug si Thomas Clark Redenius, 49, usa ka Amerikano.

Si SPO3 Antonio Barade, desk officer sa Carbon Police Station nga nahinabi sa Banat News miingon nga ang Alert Team A sa Carbon Police maoy nakasikop sa tulo.

Kagahapon sa sayong buntag matud pa ni Barande nga nakadawat sila og kasayoran nga naa sa usa ka pension house sa eskina dalan Pelaez ug Sanciangko si Alexander hinungdan nga giadto kini nila ni SPO1 Necito dela Victoria Jr., SPO1 Artemio Tundag III, PO3 Roy Cabahug ug si PO2 Vinancio Sularte dala ang warrant of arrest niini.

Ug ilang naaktohan sulod sa usa ka lawak sa pension house ang tulo nga nagsuyop hinungdan nga gisikop nila kini. Ang tulo natanggong sa Carbon Police Station aron mapasakaan og kaso.  (BANAT NEWS)