PIB raid sa Toledo City, P1M shabu nasakmit
CEBU, Philippines - Nasikop sa kapolisan ang tulo ka lalaki nga nakuhaan og kapin sa P1 milyon nga shabu atol sa pagpangronda sa Sitio Luray Dos, Barangay Poblacion sa dakbayan sa Toledo sa miaging hapon.
Ang nasikop mao sila si Nestor Viloria Pagdalian, Alexis Velayo ug si Charlie Mandaue.
Si PO1 Deomelin Abarquez sa Operations sa Cebu Provincial Police Office nga nahinabi sa Banat News miingon nga pasado alas 5:00 sa hapon nasikop ang maong suspek. Ang misikop kanila mao ang Provincial Intelligence Branch (PIB), Provincial Investigation and Detection Management Branch, ug Provincial Anti-Illegal Drugs Special Operations Task Group (PAIDSOTG).
Nasakmit sa kapolisan ang upat ka dakong pakete, tulo ka medium sized, ug 21 ka gamay nga pakete nga may sud nga gituohang shabu nga may gibug-atong 100.1 gramos ug kung mabaligya na sa kadalanan nagkantidad og P1,189,559.
Nakuhaan ‘sab ang mga suspek og usa ka kalibre .22 Magnum nga may pito ka bala ug usa ka snubnose nga kalibre .38 nga revolver nga may lima ka bala.
Pasakaan ang mga suspetsado og kasong kalapasan sa Article 5 ug 11 sa Section 2 sa R.A. 9165 kun Comprehensive Dangerous Drugs Act of 2002 ug kalapasan sa R.A. 10591 kun Comprehensive Law on Weapons and Ammunition. (BANAT NEWS)
- Latest
