Helium Balloon naa na sa Lapu-Lapu

CEBU, Philippines -  Gilusad kagahapon sa Hadsan Beach Resort Complex sa Agus, dakbayan sa Lapu-Lapu ang bag-ong recreational activity.

Usa ka Cebu Helium Balloon ang gitukod sa maong complex diin makadani og mga nagkalain-laing mga turista human usab sa paglusad sa flyboard watersport sa miaging semana. Kini gipanagiya ni Jack Song, chief executive officer sa Aura, Incorporated diin nagsugod ang ilang operations sayo ning tuiga.

Ang mao nga balloon adunay diameter nga 22.80 meter ug 34 ka metros ang gitas-on. Molupad kini sa 150 ka metros sulod sa 15 ka minutos. Adunay 30 ka mga pasahero ang pwede makasakay sa helium balloon. Usa ka 360 panoramic view sa mga isla sa siyudad ang makita ilabi na sa mga beach resorts ug hotels ug tourist spots sa dakbayan diin mahimong makalakaw-lakaw ang mga pasahero niini.

Ang kompanya adunay pito ka mga piloto nga maoy mohatag og giya sa publiko. Matud ni Helena Hwang, chief secretary sa mao nga kompanya, nga mao kini ang labing unang recreational ride nga gibutang sa Mactan.

Dugang ni Hwang, gitan-aw nila ang probinsya sa Bohol ug Boracay nga mga lugar nga pwede mabutangan og helium balloon.

Nipili ang mao nga kompanya sa siyudad sa Lapu-Lapu kay nindot kini og mga beach resorts ug duolanan kini og mga turista.

Si Mayor Paz Radaza nagkanayon nga adunay permit ang kompanya nga magtukod niini ug naa sila’y gisunod nga precautionary measures.

May tourist police ug environment officers ang ibutang duol sa Hadsan alang sa dugang nga seguridad sa lugar ilabi na sa mga pasahero niini.

Si acting Police Chief Senior Supt. Armando Radoc sa Lapu-Lapu City Police Office miingon nga magbutang sila og perimeter lightings sulod sa complex alang sa dugang seguridad. Nagkalain-laing mga nasud ang adunay Helium Balloon rides sama sa Germany, United States of America, Korea, Singapore, France, Spain, Italy ug Canada. (/GMR)(BANAT NEWS)