Usa patay sa raid

CEBU, Philippines -  Usa ang patay, usa ang samdan ug upat ka mga suspek ang nasikop sa joint operation nga gipahigayon sa Regional Intelligence Division, Regional Special Operations Group, ug sa Ubay Police Station batok sa mga armadong lalaki nga nalambigit sa ilegal nga drugas kagahapon sayo sa buntag sa Ubay, Bohol.

Ang mga suspek matud pa kauban sa kanhi pulis nga napatay nga si Owen Rosales nga nalambigit sa pag-ambush kang Ubay Police Station chief, Chief Inspector George Caña niadtong Hunyo. Si Romulo Caño, 31, napulisan patay sa kapulisan diha sa balay niini sa Barangay Achile.

Samtang nasamdan usab si Romulo Cabañero human misukol sa kapulisan. Siya nasikop sa laing safehouse ni Caño sa Barangay Poblacion.

Nadakpan usab ang ilang mga kauban nga sila si Raymond Cutaran, 20; Felixberto Escalante , 47; Ramon Toyac, 43; ug Randy Quiros, 39, pulos taga Ubay.

Nakuha gikan sa mga suspeks ang usa ka rifle grenade, fragmentation grenade, AR15 Rifle, tulo ka KG9 submachine pistols,  .45 pistol nga dunay magazine ug holster, upat ka KG9 magazines, 97 ka  bala sa .9mm, 18 ka bala sa .45, pito ka bala sa .357, nagkadaiyang drug paraphernalia, duha ka medium ug lima ka paketeng shabu nga mokantidad og P160,000 ug P23,000   nga gituohang halin ug mga “blue books.”

Ang mga shabu ug armas gidala na ngadto sa Philippine National Police Crime Laboratory-7 sa Camp Sotero Cabahug, Cebu City alang sa chemical analysis ug ballistics examination.

Ang kapulisan armado og search warrants sa kasong RA 10591 or Comprehensive Firearms and Ammunitions Regulations Act nga giluwatan ni Regional Trial Court Judge Gilbert Moises, Branch 18, Cebu City, sa dihang gihimo ang operasyon alas 2:45 sa buntag.

Ang team nga gipanguluhan ni Senior Inspector Romeo Sentinta mi-served sa warrant sa balay ni Caño sa Barangay Poblacion diin didto si Cabañero apan giingong wala kini mi-surrender ug nakigpinusilay hinungdan nga kini napusilan sa kapulisan.

Laing team sa kapulisan nga gipangulohan ni Superintendent Rex Derilo mi-serve og samang warrant sa Barangay Achile diin didto si Caño nga nakigpinusilay usab sa kapulisan.

“He was hit in different parts of the body but he did not make it alive at the hospital,” matud ni Senior Superintendent Conrad Capa, deputy regional director for operation. Si Capa midugang nga ilang gitan-aw ang mga armas nga posibleng nagamit sa mga pagpamusil sa  maong lugar.

Si Police Regional Office-7 Director, Chief Superintendent Prudencio Bañas, mibutyag nga si Caño apil sa pagplano sa pagpatay kang Chief Inspector Caña ug naila usab ang suspek nga level one drug pusher ug drug financier hulip kang Rosales.

“We cannot say that neutralized na ang Bohol in terms of illegal drugs…we have to monitor pa,” matud ni Bañas.

Si Caña gi-ambush sa Talibon pipila ka metros na lang gikan sa balay niini adtong Hunyo ug ang gitumbok nga miambus kaniya mao ang grupo ni Rosales kinsa napatay usab atol sa followup operation sa Bien Unido, Bohol nianang pagkasunod adlaw. (/EIM)(BANAT NEWS)