Shabu gipalaman sa torta; laing usa gitulon og dali

CEBU, Philippines - Usa ka piniriso sa Cebu Provincial Detention and Rehabilitation Center nasakpan nga nagdala og duha ka pakete sa shabu atol sa inspeksiyon nga gihimo sa mga jailguards sa maong prisohan kagahapon sa buntag.

Si Norlyn Suico kinsa upat na ka tuig nga napriso sa CPDRC nasakpan nga nagdala og shabu nga gipalaman sa gidala niyang torta gikan mitambong sa iyang hearing sa kasong may kalambigitan sa ilegal nga drugas.

Si Suico mitambong sa iyang hearing sa lungsod sa Argao pasado alas-8 sa buntag sa miaging Martes  ug pagkahuman gibalik kini og dala sa mga jailguards sa CPDRC.

Apan sa pagrekisa sa iyang mga gipangdala pagbalik sa prisohan, nasakpan nga dunay duha ka paketeng shabu ang torta nga iyang gidala.

Si Marco Toral, consultant sa CPDRC miingon nga ilang gibartolina si Suico tungod niini. Gikatakda siyang pasakaan og lain na usab nga  kasong kalapasan sa Akta Republika 9165. Gisubay karon sa kapolisan kun si kinsa ang mitunol kang Suico sa maong torta nga ang tumong mao ang pagpalusot niini diha sa CPDRC. Kahinumdoman nga usa ka Jocelyn Correa nga nadakpan duha ka semana na ang milabay tungod sa pagpamaligya og shabu ang mibutyag nga sa CPDRC naggikan ang supply sa iyang drugas.

Apan kagahapon, nausab ang tonada ni Corea kinsa napriso na usab sa CPDRC karon kay miluwat kini og affidavit nga mibakwi sa iyang pamahayag ug nangayo og pasaylo sa tawong iyang gitumbok nga iyang supplier diha sa CPDRC ug kang Gobernador Hilario Davide III.

Samtang sa Talisay City Jail, usa ka babaye nga kanhi inmate sa maong pasilidad ang balik prisohan human nga nasakpang nagdala og gagmay'ng pakete sa gituohang shabu dihang miduaw sa iyang higala nga priso.  Ang nasakpan mao si Edna Murillo, 40 anyos, residente sa Pahina Central, siyudad sa Sugbo.

Si Jail Officer 1 Geraldine Calum kinsa maoy nagpahigayon og body frisk kang Murillo miingon nga boluntaryong nagpakapkap si Murillo apan nakamatikod siya nga daw wala kini mahimutang.

Dihang gikapkapan na ni Calum ang paa ni Murillo iyang namatikdan nga dunay nagbagal sa iyang tuo nga tiil ug giingong nagpakaaron-ingnon pa kining nangawot. Apan dihang gipiko  ang karsones niini nasakpan ang gagmay'ng pakete sa gituohang shabu nga giputos og plastic ug diha na mikisi-kisi ang suspetsado ug giilog ang ang ubang pakete ug gitulon.

Ang pangulo sa operation section sa Talisay City Jail, SFO3 Danilo Rodriguez Jr. miingon nga wala silay impormasyon nga nadawat nga dunay ipalusot nga drugas si Murillo apan nasakpan lang kini tungod sa gihimong body search.

Nasayran napriso na niadtong milabay'ng tuig si Murillo tungod sa kasong pagpangawat ug nakagawas ra usab kini sa susamang tuig.

Subayon usab karon sa Talisay City Jail ang report nga matud pa dunay inmate nga nagsugo kang Murillo aron mopalusot sa ilegal nga drugas. (BANAT NEWS)