Duha patay sa ambush
CEBU, Philippines - Dead on the spot ang usa ka chief tanod samtang nakabsan ‘sab sa kinabuhi sa tambalanan ang drayber sa motorsiklo nga iyang gisakyan human sila gi-ambush sa unom ka mga lalaki sa Sitio Palanas, Barangay Jolomaynon, Dalaguete, Cebu, alas 4:30 kagahapon sa hapon.
Ang mga biktima naila nga sila si Paterno Aliñabon, alyas Erning, nga taga Sitio Cankahilig, Caliongan, Dalaguete, chief tanod sa maong lugar ug si Andrew Heredia, 21, taga Sitio Tubod, Barangay Obong, Dalaguete nga maoy nagmaneho sa motorsiklo.
Matud pa ni PO2 Christopher Romarate sa Dalaguete Police nga nahinabi sa Banat News nga gikan sa Poblacion ang mga biktima, apan pag- abot sa maong lugar, kalit sila nga gipaulanan og bala sa unom ka mga lalaki.
Natumba ang mga biktima ug nakabsan sa kinabuhi si Aliñabon, apan si Heredia ang nakahigayon pa og dagan apan giapil kini sa pagpusil sa mga lalaki ug nakaangkon og mga samad sa kalawasan.
Nadangat pa sa Julio Cardinal Rosales Memorial Medical Center si Heredia nga nakatug-an pa sa kapulisan nga unom ka mga tawo ang nag- ambush kanila.
Gibalhin kini sa tambalanan sa dakbayan sa Sugbo apan sumala pa ni PO2 Romarate nakabsan gayod kini sa iyang kinabuhi. Way nagpuyo sa maong dapit diin nahitabo ang ambush.
“Igo lang gyod siya nakatug-an nga unom ka tawo, problema gyod kaayo ni kay siya ra man g’yud unta ang pwede nga makatestigo. Ambush area man g’yud ‘tong lugaraha, kakahoyan man na nga lugar, giplanohan g’yud to siguro nga i-ambush sila”, matud pa ni PO2 Romarate.
Usa sa mga mitumaw nga anggulo nga nadudahan nga asset si Aliñabon mao nga gi-interesan sa mga grupo nga nakabangga sa kapulisan sa Dalaguete sa ilang kampanya batok ilegal nga drugas. (BANAT NEWS)
- Latest
