Magsuon gipamusil

CEBU, Philippines- Duha ka magsuon ang nalandig sa tambalanan human nga gipamusil sa igsoon sa ilang nakainom ug nakaaway diha sa Barangay Agbalanga, Moalboal sa miaging hapon.

Ang mga biktima naila nga sila si Enereo Comighud, 48,  ug Julio Comighud, 42, pulos nagpuyo sa Barangay Busay, Moalboal.

Samtang gitudlo nga suspek sa pagpamusil giila nga si Prodencio Tabulong Jr., nagpuyo sa Barangay Agbalanga sa maong lungsod.

Sumala pa ni PO1 Peter Paul Tampus sa Moalboal Police Station nga nahinabi sa Banat News nakig-inom ang mga biktima kang Jimmy Tabulong, apan dihang nangahubog nagkabingkil ug gitabangan og kulata si Tabulong.

Si Prodencio pagkakita sa gibuhat sa duha sa iyang igsuon daling mikuha og armas ug gipamusil ang duha. Ang duha pulos nalandig karon sa Vicente Sotto Memorial Medical Center (VSMMC).

Ang suspek padayon pang gipangita sa kapulisan. - /EIM) (BANAT NEWS)