Lider sa ‘kulto’ ni plead not guilty

CEBU, Philippines- Mi-plead not guilty sa kasong  serious illegal detention ug illegal possession of firearms ang gipasanginlang lider sa kulto nga si Casiano Apduhan alyas Tatay Loloy sa barangay Buanoy sa lungsod sa Balamban.

Gipaubos sa arraignment ang kaso sa sala ni Judge Hermes Montero sa Regional Trial Court RTC Branch 59 kagahapong adlawa. Si Apduhan kusganong mihimakak nga kulto ang ilang grupo.

Una niini gireklamo si Apduhan sa kasong illegal detention human giingong gitanggong ang usa ka 33-anyos nga babaye sa balay niini sulod sa dul-an lima ka tuig gikan sa Nobiyembre 27, 2008 hangtod sa Marso 26, 2014 sa Laray 3 barangay Buanoy lungsod sa Balamban.

Apan sa una nang pagdungog gihimakak sa maong  babaye nga gitanggong kini sulod sa panimalay ni Apduhan.

Samtang gihimakak usab ni Apduhan nga iya ang mga armas nga nasakmit nga naglangkob sa duha ka paltik .38 rebolber atol sa gipahigayong pagronda sa National Bureau of Investigation NBI-7 sa panimalay sa akusado.

Gawas sa maong mga kaso giakusahan usab si Apduhan  pagpatay sa usa ka 15- anyos nga batang lalaki nga si Angelo Repuela kansang kalabira napalgan ilawom sa 30 ka tiil nga tunnel sulod sa panimalay ni Apduhan, apan hugot kining gihimakak sa akusado.

Gikatakda  ang pre-trial  sa maong mga kaso sa Septiyembre 10 ning tuiga. - /EIM) (BANAT NEWS)