Russian hubog nanghagis, gidakop

CEBU, Philippines- Gumikan sa kahubog gisikop sa mga barangay tanod ang usa ka Russian human nasigpati nga nanghagis ug nangguba og mga butang niadtong Domingo sa gabii sa Duljo-Fatima, dakbayan sa Sugbo.

Giila ang langyaw nga si Sergeoich Dwinner, 41, kasamtangang nagpuyo sa barangay Lahug.

Matud ni SPO3 Sean Colobio, desk officer sa Mambaling Police Station, nga niagi ang langyaw sa maong dapit ug nanghagis.

Tungod sa kahadlok sa mga residente, daling nitawag sa mga barangay tanod kinsa daling miresponde ug gidala ang langyaw sa Barangay Hall. Sulod sa Barangay Hall, giingong nanghagis pa gyud si Dwinner ug nangguba sa kisame, wall clock ug timbangan.

Gidala ang langyaw sa Cebu City Medical Center alang sa liquor test ug medical examination ug nasuta nga kini ubos sa impluwensiya sa ilimnong makahubog.

Gitanggong sa Mambaling Police Station si Dwinner ug gipasakaan kini sa kasong malicious mischief samtang naghulat ang kapolisan sa iyang igsuon nga moabot kung makig-areglo ba kini ngadto sa kapolisan. - /GMR) (BANAT NEWS)