Car washer nagpahuway gipusil patay
CEBU, Philippines- Patay ang usa ka car washer human pusila sa kadaghang higayun sa wala mailhing mga suspetsado pasado alas 11:30 niadtong Domingo sa gabii sa Calamba, dakbayan sa Sugbo.
Giila ang biktima nga si Benjamin Fernandez, 67, nagpuyo sa Sitio Mendiola sa maong barangay.
Si PO3 Leroy Baguio, imbestigador sa Homicide Section sa Cebu City Police Office (CCPO), miingon nga samtang ang biktima nagpahulay gikan sa iyang trabaho daplin sa karsada duol sa usa ka bakeshop, duha ka wala mailhing tawo nga sakay og motorsiklo ang kalit lang mihunong pipila ka metros ang gilay-on sa gilingkuran ni Fernandez.
Nanaug ang usa ug gipusil sa kadaghang higayon ang biktima kinsa nakaangkon og samad pinusilan sa iyang tiyan, paa ug sa laing parti sa lawas.
Wala’y nakaklaro sa hitsura sa gunman sa mga saksi tungod sa kangitngit sa lugar.
Daling gidala sa Cebu City Medical Center si Fernandez sa iyang kapuyo nga si Maria Theresa Padayao apan gideklarar kining patay human sa pila ka minutos. - /GMR) (BANAT NEWS)
- Latest
