Anti –dispatching sa Mandaue gihugtan
CEBU, Philippines - Hingpit karong gipatuman sa dakbayan sa Mandaue ang pagpanakop sa mga dispatchers sa kadalanan hinungdan nga daghan ang nangabalhug sa prisohan.
Si Edwin Ermac, operation chief sa Traffic Enforcement Agency of Mandaue (TEAM), miingon nga labi pa gyud nilang gihingusgan ang pagpatuman sa anti-dispatching ordinance pinaagi sa pagmugna sa usa ka task force.
Duha ka grupo sa anti-dispatching task force ang magsakay sa patrol nga molibot sa kadalanan sa dakbayan sulod sa 24 oras nga gitahasan sa pagdakop sa mga dispatchers sa kadalanan.
Ang TEAM wala magbutang og loading ug unloading area sa mga PUJ kay nagpasabot kini nga bisan asa gitugot ang ilang pagpasakay ug pagpakanaug sa pasahero.
Gipasabot ni Ermac nga ang gidili lang nila ang pagpahunong sa mga PUJ taliwala sa dalan nga makabalda na hinuon sa nagsunod nga sakyanan.
Gitataw ni Ermac nga nindot unta magbutang og loading ug unloading areas sa mga PUJ apan himoon kining terminal sa ubang drayber.
Adunay pipila ka mga drayber nga dili molarga kun dili mapuno nga makadasig na hinuon sa mga dispatcher sa pag-istambay aron manawag og pasahero. (BANAT NEWS)
- Latest
