Panday gipusil sa kainom
CEBU, Philippines - Gipusil patay ang usa ka panday human sa nahitabong panaglalis tali sa iyang kainom sa sitio Santa Monica, Pusok, dakbayan sa Lapu-Lapu niadtong Biyernes sa gabii.
Ang biktima mao si Joey Cuartero, 30-anyos samtang ang suspetsado nailhan sa pangan nga Ruel Galleta, 45-anyos, kinsa trabahante sa Mactan Export Processing Zone (MEPZ) ug parehong nagpuyo sa barangay Ibo.
Matud ni PO1 Jade Querubin sa Lapu-Lapu City Police Office - Homicide Section nga ang duha nag-inom kuyog sa laing higala nga si Felix Ramos sa balay ni Judito Ramos.
Samtang nagtagay sa ilimnong makahubog, kalit nitumaw ang panaglalis ni Cuartero ug Galleta.
Si Galleta nga adunay dalang pusil nibunot ug kalit gipusil si Cuartero kinsa naigo sa wala’ng bahin sa iyang liog.
Daling niresponde ang Emergency Rescue Unit Foundation (ERUF) ug gidala sa Lapu-Lapu City Hospital ang biktima apan gideklarar nga dead on arrival. Dugang ni Querubin nga personal nga kasuko ang posibleng motibo sa pagpamusil sa suspetsado kinsa daling nisibat palayo sa lugar. (BANAT NEWS)
- Latest
