JO sa City Hall tungaon sa mayor, konseho
CEBU, Philippines - Nagtinguha ang mga sakop sa konseho sa dakbayan sa Sugbo nga sila ang motudlo sa katunga sa mga Job Order personnel sa City Hall.
Kini aron pagseguro nga ang kapin 1,000 ka JOs magtarung sa ilang trabaho sumala pa ni Konsehal Eugenio Gabuya Jr.
Si Konsehal Sisinio Andales niuyon sa pamahayag ni Gabuya aron ang 813 ka JOs, 400 kapin niini iya sa mayor samtang ang laing 400 kapin bahinon sa mga konsehal.
Ang mga konsehal aduna’y gahum sa pag-rekomendar sa mga JOs nga motrabaho sa City Hall apan sila nanghinaut nga hatagan og gibug-aton ang ilang rekomendasyon sanglit si Mayor Michael Rama gihapon ang mo-aprobar.
Kahinumduman nga sa niaging buwan aduna’y 28 ka JOs sa Prevention, Restoration, Order, Beautification and Enhancement (PROBE) ang wala nakadawat sa ilang mga sweldo tungod sa kakuwang sa mga papeles.
Ang maong mga JOs nagtrabaho sa Enero apan Marso na nadawat sa konseho ang budget request gikan sa pangulo sa PROBE nga si Raquel Arce alang sa sweldohan.
Matud ni Konsehal Noel Wenceslao nga kung mag-hire o mag-renew sa mga JOs kinahanglan kini sa approval sa konseho aron malikayan ang bulilyaso. (BANAT NEWS)
- Latest
