Pag-abli sa bag-ong merkado gubot

CEBU, Philippines -  Giablihan na ang bag-ong merkado sa lungsod sa Minglanilla apan mitumaw ang tensiyon human duna’y mga manindahay ang nagdumili sa pagbalhin.

Kini bisan pa man og ang karaang merkado giputlan na sa linya sa kuryente, suga ug gani gikandaduhan ug wala na pasudli og mga mamalitay.

Ang kagamhanan sa lungsod mihulga nga posibleng mogamit sila og kusog aron mapugos ang mga nagdumili nga mga manindahay nga mobiya sa karaang merkado.

Nasuta nga ang mga manindahay nga sakop sa Minglanilla Public Market Vendors Multi-Purpose Cooperative wala mobiya sa karaan nilang pwesto. Ang presidente sa kahugpungan, Sherbie delos Reyes, miingon nga dili sila mamalhin tungod kay gawas nga layo ang lugar giingong mahal usab sila og abangan.

Gani ang iyang mga sakop mipahibawo nga bisan og gisirad-an ang karaang merkado dili gyud sila mamahawa.

Hinuon, dunay pipila ka manindahay ang nakahukom nga mobalhin tungod kay alang kanila hamugaway ang bag-ong lugar ug sila nagtuo nga moadto ra gyud ang ilang mga          suki.

Ang Municipal Administrator sa lungsod, Concordio Mejias, miingon nga ila unang hatagan og higayun ang mga manindahay nga dili mobalhin.

Apan ilang sabutan kun hangtud kanus-a hingpit nga sirad-an ang karaang merkado ug kun magmagahi, mogamit sila og kusog pinaagi sa mga polis aron masirad-an na gyud kini.

Iyang gipasabot nga dili layo ang merkado sanglit distansiya lang kini og pila ka metros gikan sa karaang merkado. Una niini, si delos Reyes nangangkon nga gi-harass sila sa mga polis nga gipadala sa munisipyo   sa merkado.

Ang maong pasangil hugot nga gihimakak sa hepe sa Minglanilla Police Station, Senior Insp. Richard Gadingan, sanglit silang mga polis wala’y gidapigan.(/GMR)(BANAT NEWS)