Pagpamutol sa Acacia gihunong

CEBU, Philippines -  Gihunong una ang pagpamutol sa kahoy sa dakbayan sa Naga ug lungsod sa San Fernando sa habagatang bahin sa probinsiya sa Sugbo.

Kini human niluwat og direktiba si DENR Sec. Ramon Paje sa pagpa-recall sa special tree cutting permit (STCP) nga giisyu sa ilang rehiyonal nga buhatan ngadto sa DPWH.

Nahunong niadtong Huwebes sa gabii ang pagpamutol sa Department of Public Works and Highways ug Department of Environment and Natural Resources sa mga century-old acacia trees dihang dunay mga environmentalists ang mikatkat sa kahoy ug mibabag sa pagpamutol.

Gumikan niini daling miresponde ang mga sakop sa SWAT sa Naga City Police Station ug giingong mibahad sa mga mikatkat nga panakpon kun usbon ang ilang gihimo.

Boluntaryo hinuong mikanaug ang mga environmentalists ug nagpaila nga sila si Ursolo Dimpas, Lito Lapure ug Alvin Cinco.

Nasayran nga si Kongresista Gerald Anthony “Samsam” Gullas gustong maputol na ang mga kahoy nga nakahatag og peligro sa kinabuhi sa mga tawo.

Gani nanawagan siya sa duha ka ahensiya sa gobyerno nga mohimo og sabot-sabot aron makab-ot ang unsa’y makaayo sa katawhan.

Nagtinguha ang mga environmentalists nga i-uswag sa DPWH ang pagpamutol sa kahoy ug hatagan og kahigayunan ang independent experts ug mga environmental lawyers nga mahiling ang kahoy kun angayan na ba gyud putlon.

Kini gumikan kay wala sila’y nakitang daut, dili sad guwang ang mga kahoy nga acacia ug maayo usab ang tubo niini bisan pa man og gituok ang punuan niini sa semento aron dili motuhop ang tubig sa gamot sa kahoy. (/GMR)(BANAT NEWS)