PRO-7 kuwang sa gamit alang sa SAR operations

CEBU, Philippines - Ang Police Regional Office (PRO 7) nagkuwang sa mga gamit alang sa pagtubag sa mga kalamidad dinhi sa probinsya ug palibot ning Rehiyon 7.

Kini human sa gihimo nga “Disaster Preparations Audit” nga gipahigayon sa buhatan sa PRO 7, kagahapon sa buntag. Sumala pa ni Senior Superintendent Edward Carranza ang hepe sa directorial staff sa PRO-7, kinahanglang adunay sakto nga gamit ang kapolisan sa rehiyon aron mas epektibo sila sa ilang pagresponde.

Nasuta nga usa ra ka pisi ang pwede nga magamit sa ilang mga sakop kung ugaling duna’y magkinahanglan og tabang.

Kulang ‘sab kaayo ang ilang upat ka mga rubber boats nga ilang magamit kung halapad ang search and rescue operation nga himuon.

Sumala pa ni Carranza nga nagkinahanglan sila og dugang gamit sama sa atsa, dugang mga pisi, safety lines ug uban pa’ng gamit. Ilaha na hinuon kining napahibalo sa Campo Crame ug nagpaabot pa sila kung  dunay ipadala nga dugang gamit o budget alang niini.  (BANAT NEWS)