San Diego gikawatan P100 mil
CEBU, Philippines - Kapin sa P100 mil nga balor sa mga mahalong gamit ang nahanaw sa San Diego Dancers, Inc. sa Capitol Site, dakbayan sa Sugbo human lungkaba kagahapon sa buntag.
Ang sinaligan sa maong buhatan nga si Ruel Luna, 26, taga Calamba, Laguna ug kasamtangang nagpuyo sa Basak, dakbayan sa Sugbo, ang daling nangayo og pakitabang sa Theft and Robbery Section (TRS) sa Cebu City Police Office (CCPO) human nga nadiskobrehan ang pagpanglungkab.
Matud ni Chief Insp. David Señor, hepe sa TRS sa CCPO, nga didto sa likod nga bahin sa buhatan miagi ang kawatan. Nakuha ang usa ka Apple laptop, CPU ug iPad nga mikantidad tanan og P103 mil.
Sumala pa ni Señor nga posibleng duha ka kawatan ang misulod sa opisina human nga duha ka managlahing tunob sa tiil ang nakita sa kapolisan sa crime scene.
Sa pagsubay sa taga TRS, nasuta nga wala’y close circuit television (CCTV) camera ang buhatan nga makatabang unta nga mas dali nga maila ang mga kawatan. (BANAT NEWS)
- Latest
