Pagbali sa desisyon mao ray paglaom ni Dumpit

CEBU, Philippines - Madawat ug makuha pa ni SPO1 Adonis Dumpit ang iyang mga sweldo ug mga benepisyo nga wa niya madawat samtang siya napriso, kini kun mabali ang desisyon sa pagkombikto kaniya sa ila unyang pag-apelar sa kaso ngadto sa Court of Appeals (CA).

Sumala pa ni Senior Superintendent Rey Lyndon Lawas ang hepe sa Regional Investigation Detective and Management Division (RIDMD 7) nga nahinabi sa mga tigbalita nga usa sa ilang plano karon ang pag- apelar sa maong kaso. Si Dumpit gikonbikto sa kasong homicide tungod sa kamatayon ni Ronron Go. Gipasabot ni Lawas nga sa pagkakaron, suspendido ang status sa maong polis ug tanan nga benepisyo ug sweldo niini ang dili pa niya madawat hangtod nga mahuman ang iyang kaso nga giatubang.

Samtang sa aspeto nga kasong administratiba gitug-an ni Atty. Risty Sibay ang hepe sa Technical Services Division sa buhatan sa National Police Commission (NAPOLCOM) nga nahinabi sa Banat News nga na-dismiss na ang kasong administratiba batok ni Dumpit, niadtong Marso 17,2011. Gitug-an ni Sibay nga “leave without pay” ang pwede nga matawag nga status karon sa maong polis. (BANAT NEWS)