Nag-“bomb joke” mihimakak

CEBU, Philippines - Hugot nga gihimakak sa usa ka ginang  ang report nga nanghulga kining may  sulod nga bomba ang iyang bag, ug iyaha usab gihimakak nga nag-panic ang mga pasahero sulod sa Pier 4 sa pantalan sa siyudad sa Sugbo niadtong Martes sa gabii tungod niini.

Si Charito Abao, 40, taga Camiguin kinsa nag-atubang og kasong kalapasan sa Presidential Decree 1727 mipasabot nga samtang diha pa sila sa inspection area sa port terminal kapila ka higayon siya gisita nga ipabutang sa x-ray area ang iyang mga bagahe.

Apan sumala niya nga nalimtan niya sa pagbutang ang bitbit nga plastic nga may sud nga mga duwaan sa mga bata hinungdan nga subli siyang gisita sa frisker ug miingon   siya nga “maayo gyud ipa-xray pagsuta nga way bomba.”

Matud niya nakurat na lang siya  tungod sa migawas sa balita nga nagkagubot ug nagkatibulaag ang mga tawo.

Si Atty. Evan Epe ang OIC sa Port Police miklaro usab nga way kagubot nga nahitabo apan adunay mireklamo nga mga pasahero nga giingong nakadungog sa pamahayag ni Abao kalabot sa bomba.

Matud ni Epe, ang maong reklamante matud pa giingong nakuyawan pag-ayo ug andam sa paghimo og affidavit.

Kagahapon gipasakaan og kasong kalapasan sa PD 1727 si Abao diha sa piskalya.  Matud ni Atty. Epe nga ikaduha na si Abao nga ilang gisikop tungod sa pagpangomedya kalabot sa bomba diha sa pantalan.  (BANAT NEWS)