Tulo ka polis nga “Drug protectors” girelibohan

CEBU, Philippines - Tulo ka pulis nga giingong protektor sa ilegal nga drugas sa siyudad sa Lapu-Lapu ang giparelibuhan sa pwesto ug kasamtangan unang gibalhin sa Police Regional Office-7. 

Ang City Director sa Lapu-Lapu City Police Office Senior Superintendent Armando Radoc mibutyag nga bisan og walay nagpositibo sa iyang mga tawo atol sa gihimong surprise drug test dunay tulo niya ka mga sakop ang girelibuhan.

Sa tulo ka pulis usa niini ang girekomendar g’yud ni Lapu-Lapu City Mayor Paz Radaza nga ibalhin gawas sa LCPO.

Si Radoc wa hinuon mibutyag sa mga pangalan sa maong mga pulis ug kini midugang nga walay opisyal sa tulo.

Nasayran nga si Radoc nakadawat og report labot sa giingong binuhatan sa tulo nga matud pa protektor sa illegal nga drugas.

Hinuon walay igong ebidensiya nga makapamatuod sa pasangil batok sa maong mga pulis sanglit walay mobarog nga saksi hinungdan nga girekomendar na lang nga ibalhin sila og laing pwesto. (BANAT NEWS)