Way klase karong adlawa

CEBU, Philippines- Way klase ug trabaho karong adlawa sa tibuok lalawigan sa Sugbo lakip na ang Cebu City ug Lapu-Lapu City nunot sa ika-445th Founding Anniversary sa Probinsya sa Sugbo human kini gideklarar nga special non-working holiday.

Ang Lapu-Lapu City, ug Cebu City dili na sakop sa probinsya sa Sugbo tungod kay dili naman mobotar ang mga residente sa gobernador.

Ang mga kawani sa Kapitolyo makadawat og anniversary bonus sa pagsaulog sa ika-445th Charter Day sa probinsiya.

Ang selebrasyon molanat og usa ka bulan nga gisugdan pa niadtong Agosto 1, 2014.

Karong adlawa buksan ang programa sa usa ka Santos nga Misa nga ipahigayon diha sa Capitol Social Hall sa alas 10:00 sa buntag.

Ang mga kalihukan sa kasaulogan sa Charter Day matapos kini sa Agosto 22, 2014.

Si kanhi Kongresista Eduardo Gullas sa unang distrito sa Sugbo miduso kaniadto sa Akta Republika 8952 kon “an act amending RA No. 7698” nga nagdeklara sa Agosto, 6  matag tuig nga usa ka “special non-working public holiday” sa probinsiya sa Sugbo lakip na sa mga highly urbanized cities nga naglangkub sa Cebu, Mandaue ug sa mga component cities nga gilangkuban sa Lapu-Lapu, Danao ug Toledo.

Ang maong balaod napasar sa Kongreso ug Senado niadtong Agosto 24, 1999 ug niadtong Hunyo 8, 2000.  - /EIM) (BANAT NEWS)