Kombate sa buhis sa mga JO sa Talisay
CEBU, Philippines- Padayong gi-kombate sa mga opisyal sa dakbayan sa Talisay ang buhis sa sweldo sa mga Job Orders (JOs).
Si Talisay City Accountant Viluzminda Villarante mipasabot sa mga sakop sa konseho kagahapon nga lukop nasud gipatuman ang pagkaltas sa buhis sa sweldo sa mga JO ug dili lang sa Talisay.
Sa privilege speech kagahapon ni Konsehal Francis Aznar nagkanayon nga ang mga JO mga minimum wage earners ug exempted sa income tax base sa Akta Republika 9504.
Apan si Villarante nagkanayon nga igo lang siyang nipatuman sa balaud sa Bureau of Internal Revenue (BIR).
Matud ni Villarante nga kung dili niya tumanon ang balaud siya ug ang mayor mao’y manubag. Ang konseho mihangyo kang Villarante kung pwede ma-subsidize sa siyudad ang buhis sa mga JO. Apan ang city accountant namalibad ug mipasabot nga kung ang siyudad mo-subsidize sa buhis sa JO, kinahanglang mogahin og P6.120 milyones nga budget nga lisud kung asa pangitaon.
Adunay 200 ka Confidential Assistants (CA) ang kagamhanan sa dakbayan sa Talisay karong tuiga gikan sa lima lang sa niaging tuig samtang adunay 1,700 ka mga JOs. Ang CA sama sa JO apan magdawat og P500 nga sweldo matag adlaw ug ang ubang JO tag P300 ang gidawat matag adlaw.
Gawas niini ang mga consultants nahisama usab sila sa JO tungod kay wala’y “employee-employer relation” ug matud ni Konsehal Dory Emit nga ang consultants dagku og sweldo kaysa JO. Apan ang gikaltas nga buhis parehong tag singko porsyento diin ang sweldo sa JO maibanan og P150 matag sweldo. - /GMR) (BANAT NEWS)
- Latest
