Technician, vendor gipusil patay

CEBU, Philippines- Patay ang duha ka tawo sa managlahing pagpamusil sa dakbayan sa Sugbo niadtong Domingo.

Napikas ang mata sa usa ka technician human gipusil sa luyo nga bahin sa ulo nga milapos sa iyang ilong sa sitio Huyong-Huyong, Mambaling.

Giila ang biktima nga si Edgar Inot, 48, taga Pungtod, Mambaling.

Matud ni PO3 Leroy Baguio, imbestigador sa Homicide Section sa Cebu City Police Office (CCPO), nga samtang kuhaon unta ni Inot ang iyang anak sa eskwelahan, usa ka wa mailhing lalaki ang misunod ug kalit mipusil sa biktima. Usa sa gitan-aw sa kapolisan mao ang nakalalis nga kustomer nga may gipaayong TV niadtong Huwebes.

Samtang nakabsan usab sa iyang kinabuhi ang usa ka ambulant vendor human pusila sa SRP Gate 1, San Roque.

Ang biktima giila sa ngan nga ‘Arnel’ nga residente sa maong dapit.

Matud ni PO3 Lou Pagara, imbestigador sa Homicide Section sa CCPO nga nakit-an sa usa ka security guard nga si Nicky Calago, nga naghapa ug wala na’y kinabuhi ang biktima nga gibana-banang nagpangedaron sa 30 ngadto sa 35-anyos.

Nakaangkon og samad pinusilan si Arnel sa wala nga bahin sa ulo nga milapos sa pikas bahin. - /GMR) (BANAT NEWS)