Gigulgol atubangan sa inahan

CEBU, Philippines- Usa ka 23-anyos nga lalake ang namatay human siya gigulgol sa duha ka  lalaking nagtaptap sa ilang mga nawong atubangan mismo sa iyang inahan niadtong Domingo sa gabii diha duol sa usa ka sari-sari store sa Barangay Manlapay, Dumanjug.

Ang biktima naila nga si Robert Carsolin Espedillon, 23, residente sa maong dapit kinsa maayong pagkahiwa sa iyang liog human kini gitabangan og kupot ug gipatay sa duha ka lalake nga migamit og sanggot.

Sumala pa sa imbestigasyon sa kapolisan, giapas sa inahan niini nga si Lucia ang biktima kay giingong gikan pa sa buntag hangtud na sa gabii kini nag-inom.

Apan dihang padung na sila mamauli, gikatahong dunay duha ka  lalaking nagsuot og bonnet nga nagdala og sanggot ang kalit nga mibutho ug gikuptan si Robert dayon gigulgol ang liog niini.

Matud pa ni PO2 Romeo Legaspi Jr., imbestigador sa Dumanjug Police nga nahinabi sa Banat News wala makatingog ang inahan ni Robert ug gani bisan sa pag-abot sa mga tanod ug sa kapolisan wala kini magtingog ug daw way reaksyon sa dagway niini sa nahitabo sa iyang anak.

Sumala pa ni Legaspi, base sa nakuha nilang impormasyon pwerteng daghana og kaaway sa biktima diha sa ilang dapit tungod kay samok kini kaayo kun mahubog tungod kay magmaoy ug magsaba-saba ug mangaway sa uban.

“Matud pa sa mga residente sa ilang lugar nga mamara ni siya og motor unya usahay kay iya alihan sa dalan,” si Legaspi nagkanayon.

Gituohan nga planado gyud ang pagpatay sa biktima. Sumala pa ni Legaspi gisubay pa nila kun si kinsa ang mga mamumuno gumikan kay pwerteng daghana og kaaway ni Espedillon sa ilang barangay. - /EIM) (BANAT NEWS)