Jail guards nipalusot sa drugas sa CPDRC

CEBU, Philippines- Pipila ka kawani sa Cebu Provincial Detention and Rehabilitation Center ang gidudahang nalambigit sa pagpalusot sa illegal drugs diha sa sulod sa maong prisohan sumala pa  ni Jail Warden Romeo Manansala.

“Naa tay ngalan nga apil but ang investigation ongoing pa,” sigon ni Manansala. Sumala pa nga lima ka jailguards ang giobserbahan human nga duna silay mga gipangbuhat   nga makapaduda kaayo sama sa kalit nga pagkawagtang sa ilang mga pwesto ug uban pa.

Si Gobernador Hilario Davide III daan nang mipadayag nga nagpabilin ang iyang pagsalig sa mga nagdala sa maong prisohan bisan pa man sa giingong presensya sa mga ilegal nga drugas sa maong pasilidad.

Gimandoan ni Davide si Manansala ug sa jail consultant Marco Toral sa pag-imbestiga sa maong isyu. “Ipa-drug test g’yud na nako sila kanang gidudahan. Crucial kaayo nang jail facility. They are supposed to be government employees they are supposed to protect the interest of the provincial government unya mo-facilitate sila og pag-peddle sa drug diha sa sulod so they are equally liable as the users,” matud ni Davide.

Giimbestigahan pa usab karon ang pagkasakmit sa mga drug paraphernalia gikan sa usa ka selda sa CPDRC. Gipahigayon ang maong pagsusi human gitumbok ang CPDRC sa usa ka dinakpan didto sa Liloan nga maoy tinubdan sa iyang mga drugas.

Nakig-alayon na usab ang Cebu Provincial Anti-drug Abuse Council sa Philippine Drug Enforcement Agency-7 aron sa pag-imbestigar sa maong kaso. “Kung tinuod man gani nga naay lima ka personnel  sa CPDRC, I’m sure either taktakon ba pero kung regular i-reassign,” matud sa Executive Director sa CPADAC nga si Joey Herrera.

Si Herera nakugang sa gibuhat sa Philippine Drug Enforcement Agency-7 niadtong Domingo dihang mipahigayon sila og operation greyhound dala ang tulo ka K-9 Units. Nagtuo sila nga inspeksyon lang sa mga bisita ang buhaton sa PDEA.

Apan si Mark Maramba, ang operations chief sa PDEA-7 nga gikahinabi sa Banat News mibutyag nga wa silay nasakpang kontrabando sa CPDRC.

Sumala pa ni Maramba dugay na silang nakadawat og mga report kabahin sa mga jail personnel nga nalambigit sa pagpalusot og drugas sa mga prisohan ug dili lang sa CPDRC. Matud pang Maramba, naghimo pa sila og imbestigasyon kalabot niini. - /EIM) (BANAT NEWS)